مانگێکی خوێناوی بۆ بەندکراوانی سیاسی؛ ئێران ٢٦ کەسی لەسێدارە دا

پەنجەرە

بەپێی نوێترین ئامارەکانی ناوەندی بەڵگەنامەکانی ڕێکخراوی مافی مرۆڤی هەنگاو، لە ماوەی مانگی چواردا، لانیکەم ٢٦ بەندکراو لە بەندیخانە جیاجیاکانی کۆماری ئیسلامیی ئێران لەسێدارە دراون. 
بەپێی ئامارەکە، زیاتر لە نیوەی لەسێدارەدراوەکان بەندکراوی سیاسی بوون.

ئامارەکان

لە کۆی ئەو ٢٦ کەسەی سزاکەیان جێبەجێ کراوە، ناسنامەی ٢٥ کەسیان بە تەواوی پشتڕاست کراوەتەوە. دابەشبوونی نەتەوەیی قوربانییەکان بەم شێوەیەیە:
* فارس: ١٢ حاڵەت (٤٦٪)
* تورک: ٧ حاڵەت (٢٧٪)
* کورد و لوڕ: هەرکامەیان ٢ حاڵەت
*بەلووچ: ١ حاڵەت
* نەناسراو: ٢ حاڵەت

جێبەجێکردنی سزای ١٤ بەندکراوی سیاسی

مانگی ڕابردوو بە یەکێک لە خوێناویترین مانگەکان بۆ بەندکراوانی سیاسی دادەنرێت، کە تێیدا ١٤ چالاکوان بە تۆمەتەکانی وەک (بەغی، موحارەبە و سیخوڕی) لەسێدارە دراون. زۆربەی ئەم کەسانە لە دەستبەسەرکراوانی ناڕەزایەتییەکانی "مانگی دە" بوون، لەوانە:
1. ئەمیر حوسێن حاتەمی (١٩ ساڵ)
2. محەممەدئەمین بیگلەری (خوێندکار)
3. عامر ڕامش (بەلووچ - ٢٠ ساڵ)
4. ساسان ئازادوار (لوڕ - ٢١ ساڵ)
لەگەڵ چەندین کەسی تر کە لە بەندیخانەکانی قزڵحیسار، ئەسفەهان و زاهیدان سزاکانیان جێبەجێ کراوە.
لەناو قوربانییەکاندا ناوی ژنێکی تەمەن ٢٤ ساڵ بە ناوی حەنیفە ئاوەندی دەبینرێت. ناوبراو کە خۆی قوربانیی دیاردەی منداڵ-هاوسەری و هاوسەرگیریی زۆرەملێ بووە، لە بەندیخانەی تەورێز بە تۆمەتی کوشتنی هاوژینەکەی لەسێدارە درا.

شەفافیەت و ڕێکارە یاساییەکان

ڕاپۆرتەکە ئاماژە بەوە دەکات کە دەزگای دادوەریی ئێران تەنیا ٥٨٪ی ئەم حاڵەتانەی بە فەرمی ڕاگەیاندووە. هەروەها ١٤ حاڵەت بە شێوەی تەمومژاوی و "نهێنی" جێبەجێ کراون، بێ ئەوەی بنەماڵەکانیان ئاگادار بکرێنەوە یان مافی دوایین چاوپێکەوتنیان پێ بدرێت.
پۆلێنکردنی تۆمەتەکان:
* سیاسی و سیخوڕی: ١٤ حاڵەت (زۆرترین ڕێژە)
* کوشتنی ئەنقەست: ١٠ حاڵەت
* ماددە هۆشبەرەکان: ٢ حاڵەت