کۆسرەت ڕەسوڵ چۆن لەو کردەوەیە رزگاریی بوو کە شەوکەتی حاجی موشیری پێوەبوو؟

په‌نجه‌ره‌

شەوی 8 له‌سه‌ر 9ـى مانگی شوباتی ساڵی 2003، شەوکەتی حاجی موشیر ئەندامی سەرکردایەتی یه‌كێتى و چەند فەرماندەیەکی سەربازی یەکێتی، لەلایەن سێ چەکداری ئەنسارولئیسلامەوە تیرۆر کران.

محەمەد تۆفیق، كه‌ له‌كاتى ڕووداوه‌كه‌دا بەڕێوەبەری ئاسایشی شارەزوور بوو و ئاماده‌بوویه‌كى شانۆی تیرۆرکردنی شەوکەتی حاجی موشیر بووه‌ و خۆیشی تیایدا بریندار بووه‌، وردەکاریی و چۆنیەتی ڕووداوه‌كه‌ بۆ پەنجەرە دەگێڕێتەوە.

ڕزگاربوونی کۆسرەت ڕەسوڵ

بەپێی گێڕانەوەی بەڕێوەبەری پێشووترى ئاسایشی شارەزوور، پێش جێبەجێکردنی پلانی تیرۆرکردنی شەوکەتی حاجی موشیر، ئەنسارولئیسلام ویستویه‌تى کۆسرەت رەسوڵ تیرۆر بكات، به‌ڵام بۆی نه‌چووه‌ته‌ سه‌ر.

محەمەد تۆفیق، بە پەنجەرەی ڕاگەیاند: ناکۆکی لە نێو ئەنسارولئیسلامدا دروستبوو، بەشێک لەو گروپە واخۆیان دەرخست گوایە لە ئەنسار جیا دەبنەوە و پەیوەندی بە یەکێتییەوە دەکەن، گروپەکە لەلایەن "هێمن بانیشاریی"ـەوە سەرپەرشتی دەکرا.

روونیشیکردەوە: ئەوکات دۆخی یەکێتی لەناوچەی شارەزوور باش نەبوو، ئەنسار دۆخی ناوچەکەی تێکدابوو، بۆیە بەفەرمانی (مام جەلال) بڕیاردرا هەوڵ لەگەڵ گروپە ناڕازییەکەی ناو ئەنساردا بدرێت، تا بگەڕێنەوە لای یەکێتی و چەک دابنێن.

ڕەنگە نیازیان بەرامبەر کاک کۆسرەت خراپ بووبێت، بەڵام رێگەیان پێنەدرابوو بە چەکەوە بچنە ژوورەوە

محەمەد تۆفیق وتی: سەرەتا چەند چەکدارێک لەوانەی گوایە لە ئەنسار جیا دەبنەوە بە "تەنسیق" برابوونە سلێمانی بۆ بینینی کاک کۆسرەت، بەڵام هەموو جارێک پێشوەخت چەکەکانیان لێوەرگیرابوو.

ئەو دەڵێت: "رەنگە نیازیان بەرامبەر کاک کۆسرەت خراپ بووبێت، بەڵام رێگەیان پێنەدرابوو بە چەکەوە بچنە ژوورەوە بۆ لای، بۆیە لەم پیلانە نائومێدبووبن."

وەرچەرخاندنی نه‌خشه‌كه‌ بۆ شەوکەتی حاجی موشیر

دوای نائومێدبوونی گروپەکەی ئەنسارولئیسلام لە به‌ ئامانجگرتنى کۆسرەت رەسوڵ، کەسایەتییەکی ناوچەی هەڵەبجە كه‌ هەندێک لە کەسە نزیکەکانی سەر بە ئەنسار بوون، ڕەوانەی لای شەوکەتی حاجی موشیر دەکەن، گوایە دەیانەوێت لە رێگەی ئەوەوە خۆیان ڕادەستی یەکێتی بکەن.

له‌لایه‌ن شەوکەتی حاجی موشیره‌وه‌ ئەم کەسایەتییە ڕەوانەی لای محەمەد تۆفیق دەکرێت.

محەمەد تۆفیق، وتی: كه‌سه‌كه‌ هاتە لام، پێیڕاگەیاندم گوایە هێمن بانیشاریی و ژمارەیەک چەکداری ئەنسار دەیانەوێت بگەڕێنەوە لای یەکێتی، ئەوکات ئەنسار لەناو خۆیاندا کێشەیان هەبوو، بۆیە بڕیاردرا لەگەڵ گروپەکە دانیشتن ئەنجام بدرێت. 

سەرەتا مەرجی چەکدارەکانی ئەنسارولئیسلام بۆکۆبوونەوە لەگەڵ شەوکەتى حاجی موشیر و هاتنیان بۆ ناوچەکانی ژێر قەڵەمڕەوی یەکێتی ئەوەبوو، (ئەنوەری حاجی عوسمان) یاخود (حەمەی حەمە سەعید، وەزیری ئێستای رۆشنبیری) وەکو بارمتە ڕەوانەی لای ئەوان بکرێت، تا متمانەیان لا دروست ببێت، بەڵام به‌قسه‌ى محه‌مه‌د تۆفیق، ئەم داوایەیان ڕەتکراوەتەوە.

وتی: دواتر رێککەوتن کرا لەسەر ئەوەی برایەکی من بارمتە بێت لایان و بە ئۆتۆمبێل بچین بە شوێن نوێنەری گروپە ئەنسارەکەدا، هەموو جارێک بە مێکزەمینییەک براکەی من رەوانەی لایان دەکرا و هەمان ئۆتۆمبێل ئەوانیشی دەهێنا بۆ لامان.
 

یەکتربینی شەوکەتی حاجی موشیر و چەکدارەکان 

یەکەم دیداری نێوان شەوکەتی حاجی موشیر و نوێنەری چەکدارەکانی ئەنسارولئیسلام لە تەپی سەفا دەبێت، بەڵام نوێنەرەکەی ئەنسار بەرپرسیارێتی ئەوتۆی نابێت، بۆیە شەوکەتی حاجی موشیر داوادەکات بەرپرسێکی دیاریان بۆ کۆبوونەوە بنێرن، بۆ ئەوەی بگەنە ڕێککەوتن.

دوای دیدارەکە، بە ئۆتۆمبێلە مێکزەمینییەکە، چەکدارەکانی ئەنسارولئیسلام گەڕێنراونەتەوە بۆ خورماڵ و براکەی محەمەد تۆفیق کە وەکو بارمتە لایان بووە، هێنراوەتەوە.

بەپێی گێڕانەوەی محەمەد تۆفیق، بۆ جاری دووەم لە سەراوی سوبحان ئاغا لەگەڵ نوێنەرەکانی ئەنساردا کۆبوونەتەوە، هاوشێوەی کۆبوونەوەی یەکەم بە مێکزەمینی هێنراون و براکەشی لای ئەوان بارمتە بووە.

خزمێکی نزیکی (هێمن بانیشاریی) پاسەوانی شەوکەتی حاجی موشیر بووە، بۆیە بەو شێوەیە متمانەی پێکردن

محەمەد تۆفیق وتی: نوێنەری ئەنسار لە دانیشتنەکەی سەراو، ئەبو ئەسما بوو، کاتێک لەگەڵی دانیشتین، داوامان لە (کاک جەلال) فەرماندەی ئەوکاتی شارەزوور کرد بەشدار بێت، رەتیکردەوە و گومانی لە چەکدارەکان هەبوو.

دەشڵێت: هەموو جارێک کاتێک لەگەڵ چەکدارەکانی ئەنسار کۆدەبووینەوە، لولەی تفەنگەکەم ڕوولێدەکردن و لە ئامادەباشیدابووم بۆ هەر ئەگەرێک.

بەپێی وتەکانی محەمەد تۆفیق، خزمێکی نزیکی (هێمن بانیشاریی) پاسەوانی شەوکەتی حاجی موشیر بووە، بۆیە بەو شێوەیەک متمانەی پێکردوون.

محەمەد تۆفیق وتی: لە سەراوی سوبحان ئاغا و لە دووەم دانیشتندا، ئەبو ئەسما بە کاک شەوکەتی وت، ئەمشەو دێم بۆ سلێمانی و لە ماڵت دەمێنمەوە، رەنگە نیازی ئەوەی هەبووبێت خێزانەکەی کاک شەوکەت کوشتوبڕ بکات. 

هەروەها وتیشی: من بەو کارە ڕازی نەبووم ئەبو ئەسما بڕواتە سلێمانی و براکەم لایان بارمتە بێت.

دوای گفتوگۆ لەگەڵ ئەبو ئەسما و داوا لێکردنی بۆ ئەوەی ریزەکانی ئەنسار بەجێبهێڵن و ڕوو لە لای یەکێتی بکەن، بەڵێنی داوە بگەڕێتەوە لەگەڵ هێمن بانیشاریی و ئەبو عەبدوڵڵای شافعی پرسەکە یەکلایی بکاتەوە.

دوا دیدار 

بۆ دیداری سێیەم، دانیشتنەکە خراوەتە گوندی "گامێش تەپە"، بەڵام جیاواز لە جارەکانی تر، ئەمجارە چەکدارەکانی ئەنسار بۆ جێبەجێکردنی نه‌خشه‌كه‌ هاتوون.

چەکدارەکانی ئەنسار پێكهاتبوون لە: (ئەبو ئەسما، سەرباز نانەوا، عومەر). وەفدی یەکێتیش هه‌ریه‌كه‌ له‌: (شەوکەتی حاجی موشیر، محەمەد تۆفیق، سەردار و حیکمەت) بوون.

شەوکەتی حاجی موشیر پێداگیری کردووە لەوەی چەکدارەکان ڕازیی دەکات بۆ بەجێهێشتنی ڕیزەکانی ئەنسارولئیسلام

کاتێک سێ چەکدارەکەی ئەنسار گەیشتوونەتە گوندی "گامێش تەپە"، گوڵێک و بۆنێکیان پێبووە، گوایە (هێمن بانیشاریی) بۆ (شەوکەتی حاجی موشیر)ـی ناردووە، کاتێک محەمەد تۆفیق چەمیوەتەوە گوڵ و بۆنەکەیان لێوەربگرێت، دەرفەتیان بۆ رەخساوە و چەکەکەیان "ئەمن" کردووە.

وەکخۆی ئاماژەی پێدەکات، هەموو جارێک بە شەوکەتی حاجی موشیری ڕاگەیاندووە، چەکدارەکانی ئەنسار نیازیان خراپە و دەیانکوژن، بەڵام شەوکەتی حاجی موشیر پێداگیری کردووە لەسەر ئەوەی ڕازییان دەکات بۆ بەجێهێشتنی ڕیزەکانی ئەو گروپە.

بەپێی قسەی محەمەد تۆفیق، لەگەڵ گەیشتنیان بە گوندی "گامێش تەپە"، مەرجی سێ چەکدارەکەی ئەنسار ئەوەبوو کە نابێت ئەم (محه‌مه‌د تۆفیق) بەشدار بێت لە کۆبوونەوەکەدا، بە پاساوی ئەوەی ترسیان هەیە لەوەی ناوەڕۆکی دانیشتنەکە ئاشکرا ببێت.

محەمەد تۆفیق وتی: هۆکاری رازی نەبوونیان بۆ بەشداریکردنم لە دانیشتنەکە ئەوەبوو، من هەمووجارێک فیشەکم ڕادەکێشا و ڕووی تفەنگم لێدەکردن.

وه‌كخۆی وتى: بەهۆی پێداگیریکردنی چەکدارەکانی ئەنسار و لەسەر داوای شەوکەتی حاجی موشیر، ئه‌و نەچووەتە نێو ژووری دانیشتنەکە.

وتیشی: "تەنها کاک شەوکەت و ئەبو ئەسما لە ژوورەوە بوون، خۆم و پاسەوانەکانم لەبەر دەرگای ژوورەکە وەستابووین، کاک حیکمەت و کاک سەرداریش هەر لەدەرەوە بوون، دوو چەکدارەکەی تری ئەنساریش (عومەر و سەرباز نانەوا) لەولای ئێمەوە راوەستابوون."

محەمەد تۆفیق دەڵێت: دوای چا خواردنەوە، لە ژوورەوە بوو بە تەقە، ئەبو ئەسما کاک شەوکەت و چەند کەسێکی ماڵەکەی شەهید کرد، خێرا پاسەوانەکانم ئاگادار کردەوە کە خیانەتمان لێکراوە، دوو چەکدارەکەی تری ئەنساریش لە دەرەوە دەستیان بەتەقە کرد و بوو بە شەڕ."

وتیشی: بە برینداری رۆیشتمە نزیک کوانووی ئاگری ماڵەکە و تەقەم لە دەرگای ئەو ژوورە دەکرد کە ئەبو ئەسمای تێدابوو، تا بواری هەڵهاتنی نەبێت، لەوکاتەدا دوو چەکدارەکەی تری ئەنسار نارنجۆکیان بۆ هەڵدام.

بەپێی گێڕانەوەی محەمەد تۆفیق، نارنجۆکێک لە نێو قاچەکانیدا تەقیوەتەوە و چاوەکانی پڕبوون لە ئاو و خوێن، لەوکاتەدا گوێی لێبووە چەکدارەکان وتوویانە ئەویش کوژرا، "بەڵام لەگەڵ ئەوەشدا تەقەم لە ئەبوئەسما کرد و برینداربوو."

ئەبو ئەسما بە برینداری رۆیشتبووە ئەحمەد ئاوا و دواتر گەڕابویەوە بۆ خورماڵ

محەمەد تۆفیق وتی: "سێ چەکدارەکەی ئەنسار هەڵهاتن، بەڵام ئەبو ئەسما بە برینداری رۆیشتبووە ئەحمەد ئاوا و رۆژی دواتر گەڕابویەوە بۆ خورماڵ، بەهۆی شەڕەکەوە کاک شەوکەت لە ژوورەوە و کاک سەردار و کاک حیکمەتیش لەدەرەوە شەهید بوون."

سەبارەت بە چارەنوسی ئەو برایەی کە لای ئەنسار بارمتە بوو، محەمەد تۆفیق وتی: "دوای 51 رۆژ، براکەمیان شەهید کرد."

محەمەد تۆفیق ئەبو ئەسما دەبینێتەوە 

دوای هێرشی ئەمەریکا بۆ سەر بنکەکانی ئەنسارولئیسلام لە ناوچەی هەورامان، چارەنوسی ئەو سێ چەکدارەی شەوکەتی حاجی موشیریان تیرۆرکرد، ڕووندەبێتەوە.

لە ئەنجامی تەقینەوەیەک لە ناوچەی هەورامان عومەر دەکوژرێت، دوای چەند ساڵێکیش سەرباز نانەوا لە موسڵ ده‌كوژرێت، بەڵام ئەبو ئەسما لەلایەن هێزە ئەمنییەکانی هەرێمەوە دەستگیردەکرێت.

محەمەد تۆفیق وتی: ڕۆیشتم ڕووبەڕوو لەگەڵ ئەبو ئەسما دانیشتم، پێمگوت بۆ واتکرد، وتی "خیانەتم لەتۆ و خۆم و یەکێتیش کرد."

محەمەد تۆفیق دەڵێت: ئەبو ئەسما دانی بەوەدانا، لە دانیشتنی یەکەم و دووەمدا ویستوویانە دەستبوەشێنن، بەڵام بۆیان نەڕەخساوە.

جەختیشیکردەوە: "ئەبو ئەسما دانی بەوەدانا، بۆ دانیشتنی سێهەم لەسەر داوای ئەبو عەبدوڵڵای شافعی، رێگەیان بەم (محه‌مه‌د تۆفیق) نەداوە تا لەگەڵ شەوکەتی حاجی موشیر بەشداری دانیشتنەکە بکات، بۆ ئەوەی پیلانەکە جێبەجێ بکەن."