لۆبیکردنی کورد لە واشنتۆن: کێبڕکێی هەولێر و سلێمانی لە پایتەختی بڕیار

پەنجەرە ، دەزگای زە ئەمارگی

ویلایەتە یەکگرتووەکانی ئەمریکا هاوبەشێکی سەرەکی و بێ “بەدیل”ی هەرێمی کوردستانە، بەڵام ئەم پەیوەندییە تەنها یەک لایەنە نییە. پێویستە هەرێمی کوردستان واشنتۆن قایل بکات کە خاوەن بایەخێکی ستراتیژییە و دەتوانێت لە ناوچەیەکی پڕ لە ئاڵۆزیدا ڕۆڵێکی ئەرێنی لە ڕووی ئەمنی و سیاسییەوە بگێڕێت. بۆ گەیاندنی ئەم پەیامە، لایەنە کوردییەکان پەنایان بۆ "لۆبیکردن" بردووە؛ یارییەکی باو و ناسراو لە واشنتۆن.

لۆبیکردن

بەپێی بەڵگەنامە فەرمییەکان، نوێنەرایەتی حکومەتی هەرێمی کوردستان لە واشنتۆن (KRG USA) لە ساڵی ٢٠٠٨ـەوە نزیکەی ٤٠ ملیۆن دۆلاری لە هەولێرەوە پێگەیشتووە. بەشێکی زۆری ئەم پارەیە بۆ کۆمپانیاکانی لۆبیکردن و پارێزەران و پسپۆڕانی پەیوەندییەکان خەرج کراوە، کە هەندێک کۆمپانیا مانگانە ٢٠ هەزار دۆلاریان وەرگرتووە.

کۆمپانیا دیارەکان

BGR Group:

کۆمپانیایەکی نزیک لە کۆمارییەکانە و لە ساڵی ٢٠٠٤ـەوە کار بۆ لایەنی کوردی دەکات. تا ئێستا زیاتر لە ١٠ ملیۆن دۆلاری لە حکومەتی هەرێم وەرگرتووە.

• Greenberg Traurig

کۆمپانیایەکی یاساییە و نزیکەی ٣.٩ ملیۆن دۆلاری لە نێوان ساڵانی ٢٠٠٧ بۆ ٢٠٢١ وەرگرتووە، کە زیاتر وەک "چارەسەرکەری کێشەکان" (Fixer) و بەرگریکاری یاسایی لە کەیسەکاندا کاری کردووە.

درز لە یەکدەنگیی کورددا

بۆ یەکەمجار لە ماوەی ٣٤ ساڵدا، یەکێتیی نیشتمانیی کوردستان بە جیا لە نوێنەرایەتی حکومەت، کۆمپانیای لۆبیکردنی تایبەت بە خۆی گرتووە. ئەمەش نیشانەی نەمانی متمانەیە بە دامەزراوە هاوبەشەکان و قووڵبوونەوەی ململانێی پارتی و یەکێتی لە واشنتۆن.

ململانێی میدیایی و لێدوانە دژبەیەکەکان

ڕاپۆرتەکە ئاماژە بەوە دەکات کە لەبری یەکدەنگی، ئێستا لایەنەکان لە میدیا جیهانییەکاندا دژی یەک دەوەستنەوە:
١- بافڵ تاڵەبانی: لە چاوپێکەوتنێکدا لەگەڵ (پیرز مۆرگان) ڕەخنەی لە سیستەمی حوکمڕانی گرت و ئاماژەی بەوە کرد کە "حکومەتێکمان هەیە کە لە ڕاستیدا حکومەت نییە".

٢- پێشەوا هەورامانی: وەک وتەبێژی حکومەت وەڵامی دایەوە و ڕایگەیاند کە لێدوانی کەسایەتییە حزبییەکان گوزارشت لە دامەزراوە فەرمییەکان ناکات.

٣- ڕەحیم ڕەشیدی: لە کۆنگرەیەکی ڕۆژنامەوانی لەگەڵ دۆناڵد ترەمپ، پرسیاری لەبارەی "دزینی چەک" کرد بە ئاراستەیەک کە یەکێتی پێ تۆمەتبار بکرێت، کە ئەمەش نیشانەی گواستنەوەی ململانێی ناوخۆییە بۆ ناو کۆشکی سپی.

ئەنجامگیری و لێکەوتەکان

سەرەڕای سەرکەوتنەکان لە بواری دروستکردنی پەیوەندی بازرگانی و کولتووری، بەڵام ڕاپۆرتەکە دەڵێت لۆبیکردن ناتوانێت هەموو کێشەیەک چارەسەر بکات. 
شکستی کورد لە قایلکردنی ئەمریکا بۆ پشتگیریکردنی ڕیفراندۆمی ٢٠١٧ و نەبوونی سیستمێکی بەرگری ئاسمانی، نیشانەی ئەوەیە کە هەندێک جار هەولێر خوێندنەوەی هەڵە بۆ پەیامەکانی واشنتۆن دەکات.

پارچەپارچەبوونی سیاسی و ململانێی لۆبییەکان دژی یەکتر، پێگەی کوردی لە ئەمریکا لاواز کردووە. ئەگەر کورد لە ناوخۆدا ڕێکنەکەوێت، گرانبەهاترین کۆمپانیاکانی لۆبیکردنیش ناتوانن وێنەیەکی گەش لە واشنتۆن پیشان بدەن.