سودانی: داوامانکردووە نەوت لەڕێگەی هەرێمەوە هەناردە بکرێت
١٣ ئازار ٢٠٢٦ - ٣:٣٠ پێش نیوەڕۆ
پەنجەرە
ئەندامێکی ئەنجومەنی نوێنەرانی عێراق ئاشکرای دەکات سودانی پێی ڕاگەیاندوون کە داوایان کردووە لەڕێگەی هەرێمەوە نەوت هەناردە بکرێت.
د. ڕێبوار کەریم، ئەندامی ئەنجومەنی نوێنەرانی عێراق، بە پەنجەرەی وت: ئەمڕۆ لەمیانەی کۆبوونەوەمان وەکو فراکسیۆنی هەڵوێست و کۆمەڵ لەگەڵ محەمەد شیاع سودانی- سەرۆک وەزیرانی عێراق، باسمان لە دۆخی ئابووریی عێراق کردووە دوای ڕاوەستانی هەناردەکردنی نەوت.
وتیشی: دۆخی ئابووریمان قورسە، داوامان لە هەرێمی کوردستان کردووە لەڕێگەی ئەوانەوە نەوت هەناردە بکەین، بەڵام تائێستا وەڵامی نەداوینەتەوە.
ئەمڕۆ لەپاش کۆبوونەوەکەیدا لەگەڵ فراکسیۆنی هەڵوێست و کۆمەڵ، نووسینگەی محەمەد شیاع سودانی ڕاگەیەنراوێکی بڵاوکردەوە و ئاماژەی بەوەدا کە لە کۆبوونەوەکەدا ئیدانەی هێرشەکانی سەر حەشدی شەعبیان کردووە.
لەوبارەوە د.ڕێبوار کەریم، بە پەنجەرەی وت: بەهیچ شێوەیەک لەو کۆبوونەوەیەدا باس لە بابەتی هێرشکردنە سەر حەشدی شەعبی نەکراوە و تەنها جەختمان لەوەکردووەتەوە عێراق لەم شەڕەدا بێلایەن بێت.