شەوی ڕووداوەکەی لالەزار نێچیرڤان بارزانی لەسەر هێڵ بووە

پەنجەرە

سەرچاوەیەک لە سەرۆکایەتی هەرێمی کوردستان ڕایدەگەیەنێت، شەوی هێرشەکەی سەر لالەزار، نێچیرڤان بارزانی بەردەوام لە پەیوەندیدا بووە لە گەڵ بافڵ تاڵەبانی و لاهور شێخ جەنگی.

سەرچاوەکە کە نەیویست ناوی ئاشکرابکرێت، بە پەنجەرەی ڕاگەیاند: "نێچیرڤان بارزانی هەوڵێکی زۆریدا پێکدادان ڕوو نەدات، لە کاتژمێر دەی شەوی هەینی، تاڕادەیەکی زۆر دۆخەکەی هێور کردەوە و مەترسی ڕوودانی پێکدادان بووە ئەگەرێکی لاواز."

وتیشی:" دواتر کۆمەڵێک کێشمەکێش و دەمەقاڵە لە نێوان بەرپرسانی یەکێتی و بەرەی گەل ڕوویدا، بۆیە دۆخەکە لە دەست دەرچوو، سەریکێشا بۆ پێکدادان."

بەوتەی خۆیشی "نێچیرڤان بارزانی پێناخۆشبوو پێکدادان ڕوویدا".

لایخۆشییەوە سەرچاوەیەک لە یەکێتی نیشتمانی، جەختی لە ئاگاداربوونی نێچیرڤان بارزانی لە ڕووداوەکە کردەوە.

سەرچاوەکە بە پەنجەرەی وت: بەوپێیەی سەرۆکی هەرێم، فەرماندەی باڵای هێزە چەکدارەکانە، بۆیە یەکێتی لە سەرەتاوە لە ئۆپەراسیۆنەکەیان ئاگاداریان کردووەتەوە.