ڕووخانی رژێمی ئەسەد حەپی بێهۆشکەری "کپتاگۆن"ـی لە هەرێمدا کەمکردووە

پەنجەرە

وتەبێژی دەرگای ئاسایشی هەرێمی کوردستان- سلێمانی ڕایدەگەیەنێت، دوای ڕووخانی رژێمی ئەسەد لە سوریا، حەپی کپتاگۆن زۆر بە کەمی لە هەرێمی کوردستان دەستی بەسەردا گیراوە.

عەقید سەلام عەبدولخالق، وتەبێژی دەزگای ئاسایشی هەرێمی کوردستان –سلێمانی، بە پەنجەرەی ڕاگەیاند: "رووخانی رژێمی سوریا کاریگەری لەسەر کەمبوونەوەی حەبی کپتاگۆن لە بازاڕەکانی هەرێمی کوردستاندا هەبووە."

جەختیشیکردەوە:"هێشتا بازرگانیکردن و بەکارهێنانی ماددەی هۆشبەر لە هەرێمی کوردستان بوونی هەیە، لەم ماوەیەدا دەستگیرا بەسەر چەندین کیلۆ ماددەی هۆشبەری دیکەدا".

ساڵی ڕابردوو لە نزیک قەزای دەربەندیخان دەست بەسەر کارگەیەکی مادەی هۆشبەردا گیرا کە کپتاگۆنی بەرهەم دەهێنا. وتەبێژی دەزگای ئاسایش ئاماژەی بەوەدا کارگەکە لەلایەن چەند کەسێکی سورییەوە بەڕێوەبراوە و مادەکانی تێدا درووست کراوە.

کپتاگۆن کە ناوە بازرگانییەکەی مادەی "فینیسیلین"ـە، مادەیەکی چالاککەری درووستکراوە و وەکو مادەی هۆشبەری قەدەغەکراو مامەڵەی لەگەڵدا دەکرێت. سوریای ئەسەد بە کانگای درووستکردنی ئەم مادەیە و هەناردەکردنی بۆ بازاڕە جیهانییەکان هەژمار دەکرا و ڕاپۆرتە فەرمییەکان جەختیان لە تێوەگلانی حکومەت و بەرپرسانی ئەو وڵاتە لە بازرگانییکردن بەو مادەیە دەکردەوە.