سەرچاوەیەکی باڵا له بەرەی گەل: هێشتا ژمارەی ئه‌و چەکدارانه‌مان نازانین كه له هێرشه‌كه‌ى سه‌ر لاله‌زار بونه‌ته قوربانی
٣٠ ئاب ٢٠٢٥ - ٢:٢٤ پاش نیوەڕۆ
په‌نجه‌ره
زیاتر لە هەفتەیەک بەسەر هێرشی هێزە ئەمنییەکانی یەکێتی بۆ سەر لالەزار تێپەڕدەبێت، بەڵام هێشتا ژمارەی چەکدارە کوژراوەکانی سه‌ر به به‌ره‌ى گه‌ل بە ناڕوونی ماوەتەوە، حكومه‌ت ده‌ڵێت 2 كه‌سن و سەرچاوەیەکی باڵاش له بەرەی گەل ده‌ڵێت: به‌رچاومان ڕوون نه‌بووه‌ته‌وه، به‌ڵام ژماره‌كه زیاتره.
سەرچاوەیەکی باڵای بەرەی گەل کە نەیویست ناوی ئاشکرابکرێت، بە پەنجەرەی ڕاگەیاند: "لەبارەی ژمارەی ئه‌و چەکدارانه‌مان كه بوونه‌ته قوربانى، هێشتا پێش چاومان ڕوون نییە، بەڵام چەند ژمارەیەک باس دەکرێت."
سەرچاوەکە وتی: "بیستومانە گوایە 8 چەکدارمان له‌و ڕووداوه‌دا گیانیان له‌ده‌ستدابێت، ژمارەیەکی ترمان پێگوتراوە کە زۆر ترە، بەڵام تا ئێستا وەکو بەڵگە و ناو، تەنها کوژرانی دوو کەسمان بۆ پشتڕاست بووەتەوە."
گومانی بەرپرسانی بەرەی گەل لەبارەی ژمارەی کوژراوەکانیان لەکاتێکدایە، بەرپرسانی یەکێتی دەڵێن لە ڕووداوەکەی لالەزاردا پێنج کەس گیانیان لە دەستداوە، دوو چەکداری لالەزارو سێ ئەندامی هێزە ئەمنییەکان.
عەقید سەلام عەبدولخالق، وتەبێژی دەزگای ئاسایشی هەرێم-سلێمانی، بە پەنجەرەی ڕاگەیاند: "ئەوەی تائێستا هەیە 3 کارمەندی هێزە ئەمنییەکان و دوو چەکداری لالەزار گیانیان لە دەستداوە."
جیاوازی ژماره‌ى قوربانی نێوان هه‌ردوو لا گومانى درووستكردووه، له‌كاتێكدا ژماره‌ى قوربانییه‌كانى هێزه ئه‌منیه‌كان زیاترن له‌وانه‌ى به‌ره‌ى گه‌ل، به‌ڵام بەرپرسانی یەکێتی هۆکاری کەمی قوربانییەکانی ڕیزی به‌ره‌ى گه‌ل بۆ ئەوە دەگێڕنەوە، گوایە هێزە ئەمنییەکان لە هێرش و ئەوانه‌ى به‌ره‌ى گه‌ل لە بەرگریدا بوون و وه‌كخۆیان ده‌یڵێن: "هێزی هێرشکار قوربانی زیاترە وەک لە هێزی بەرگریکار."