عێراق و کۆمپانیا نەوتییەکانی هەرێم؛ گفتوگۆکان بێ ده‌ره‌نجامن و کۆمپانیاکان داوای 2 ملیار دۆلار دەکەن
٣٠ ئاب ٢٠٢٥ - ٥:٢٣ پاش نیوەڕۆ
پەنجەرە
سەرەڕای چەندین گەڕی گفتوگۆ، تائێستا حکومەتی عێراق و کۆمپانیا نەوتییە کاراکانی هەرێمی کوردستان نەگەیشتوونەتە ڕێککەوتنێکی یەکلاکەرەوە سەبارەت بە پرسی هه‌نارده‌ى نەوتی هەرێم و شایستە داراییەکان، بڕیاریشە لەم هەفتەیەدا کۆبوونەوەیەکی نوێ لەنێوانیان به‌ڕێوه‌بچێت.
بەپێی بەدواداچوونەکانی "پەنجەرە"، کۆمپانیا نەوتییەکان داوای بڕی 2 ملیار دۆلار دەکەن، کە بەشێکی وەک قەرزی کۆن لە حکومەتی هەرێم و بەشێکی دیکەشی لە وەزارەتی نەوتی عێراق دەخوازن، وەک شایستەی فرۆشتنی نەوتی پێشوو.
محەمەد حسێن، ئەندامی تۆڕی ئابووریناسانی عێراق، بە پەنجەرەی ڕاگەیاندووە: "کۆمپانیاکان داوای ملیارێک دۆلاری قەرز لە حکومەتی هەرێم دەکەن، کە په‌یوه‌ندی به‌و نه‌وته‌وه هه‌یه كه پێشتر فرۆشراوه و پاره‌كه‌ی پێنه‌دراوه‌ته‌وه. هه‌روه‌ها داواى ملیارێک دۆلاری دیکەش له وه‌زاره‌تی نه‌وتی عێراق دەکەن به‌هه‌مان شێوه، كه وه‌ك شایسته‌ى ئه‌و نه‌وته‌یه پێشتر دابینیان كردووه."
ئاماژەی بەوەشدا، "تا ئێستا داواکارییە سەرەکییەکانی کۆمپانیاکان جێبەجێ نەکراون، کە بریتین لە گەیشتن بە ڕێککەوتنێک لەگەڵ حکومەتی عێراق و دابینکردنی گەرەنتی بۆ شایستە داراییەکانیان لە داهاتوودا."
ئەم کۆبوونەوە چاوەڕوانکراوە گرنگییەکی زۆری هەیە، چونكه پرۆسه‌ى هه‌نارده‌كردنى نه‌وتى هه‌رێم ڕاسته‌وخۆ په‌یوه‌سته به ناردنى به‌شه بودجه‌ى مانگانه‌ى هه‌رێم له‌لایه‌ن به‌غداوه، له‌كاتێكدا دۆسییه‌ى نه‌وت له‌نێوان هه‌ردوو وه‌زاره‌تى سامانه سروشتییه‌كان و نه‌وتدا یه‌كلایی بووه‌ته‌وه و ڕێككه‌وتنى له‌سه‌ر كراوه، به‌ڵام ئه‌وه‌ى ماوه‌ته‌وه ڕێككه‌وتنى كۆمپانیا نه‌وتییه‌كانه له‌گه‌ڵ حكومه‌تى ناوه‌ند.