سکاڵا لەسەر بەرپرسانی پارتی له ئه‌مه‌ریكا؛ ڕاوێژکارێکی پێشووی کۆشکی سپی بەڵگە دەخاتەڕوو، پارتیش تۆمەتەکان ڕەتدەکاتەوە
٣٠ ئاب ٢٠٢٥ - ٨:٠٠ پاش نیوەڕۆ
په‌نجه‌ره
راوێژكارێكى پێشووى كۆشكی سپی كه هه‌ڵمه‌تێك بۆ دادگاییكردنى ژماره‌یه‌ك به‌رپرسی پارتى و بنه‌ماڵه‌ى بارزانى له ئه‌مه‌ریكا به‌ڕێوه‌ده‌بات، باس له‌وه‌ده‌كات چه‌ندین به‌ڵگه‌نامه و دۆسییه‌یان دژى تۆمه‌تباره‌كان داوه‌ته دادگا، به‌رپرسێكى پارتیش هه‌وڵه‌كه به ده‌ستێكى سیاسیی ده‌زانێت و ده‌ڵێت: "بۆ لێدانه له خودی سه‌رۆك بارزانى."
له دیدارێكدا له‌گه‌ڵ په‌نجه‌ره كه له چه‌ند ڕۆژی داهاتوودا ده‌قه‌كه‌ى به ته‌واویی بڵاوده‌كه‌ینه‌وه، ستێفن ستەدرت، کە راوێژکاری چوار سەرۆکی پێشووى ئەمەریکا بووە و ئێستا وه‌كو چالاكوانى ئازادییه‌كان له‌سه‌ر ئاستى جیهان كارده‌كات، باس له‌و سكاڵایانه ده‌كات كه له دادگاكانى ئه‌مه‌ریكا دژى به‌رپرسانى پارتى و بنه‌ماڵه‌ى بارزانى تۆماریان كردووه.
ئه‌و باس له‌وه‌ده‌كات: "دۆسییه‌كان هەر لە پیلانگێڕی و باج و دەستوەردان لە مەسەلەی کۆچ و کۆچبەرانەوە تێیدایە تا بازرگانیکردنی نایاسایی."
ده‌رباره‌ى ئه‌وه‌ى كه‌یسه‌كه‌یان به‌كوێ گه‌یشتووه، ستێفن باسی له‌وه‌كرد هێشتا له قۆناغی لێكۆڵینه‌وه‌دایه به‌وپێیه‌ى "سیستەمی دادوەری ئەمەریکا کەمێک خاوە لە بڕیارداندا".
له‌به‌رامبه‌ردا یه‌كێك له‌و كه‌سانه‌ى كه كادیری پارتى دیموكراتى كوردستانه و ناوى له‌نێو ئه‌و كه‌سانه‌دایه كه سكاڵاى له‌سه‌ر تۆمار كراوه، تۆمه‌ته‌كان ڕه‌د ده‌كاته‌وه و پێیوایه هه‌وڵه‌كه ده‌ستێكى سیاسی له پشته‌وه‌یه.
ئه‌و كه نه‌یویست ئاماژه به ناوی بكرێت، بە پەنجەرەی ڕاگەیاند: "ئەو کەسانەی سکاڵایان تۆمارکردووە بە دەستی سیاسی ئەو کارەیان کردووە، چونکە پارەیەکی ئێجگار زۆر خەرج دەکەن، گەر دەستەکە سیاسی نییە، ئەم هەموو پارەیان لەکوێ بووە؟"
وتیشی: "ئەوان ڕۆیشتوون سکاڵایان لەسەر هاوسەری سه‌رۆك بارزانى (مەسعود بارزانى) تۆمارکردووە، لەکاتێکدا بەتەمەنی تەداخولی سیاسی نەبووە، ئەگەر ئەمە دەست نەبێت چییە؟"
سكاڵاكانى ستێفن و تیمه‌كه‌ى، ته‌نها ڕووبه‌ڕووى ئه‌و به‌رپرسانه كراونه‌ته‌وه كه پارتین.
له‌وه‌ڵامى پرسیارێكى په‌نجه‌ره‌دا له‌باره‌ى ئه‌وه‌ى بۆچی به‌رپرسی یه‌كێتى تێدا نییه؟ سێفن وتى: "هەزاران بەڵگەمان لەسەر ئەو کەسانە هەیە بۆیە ئەم ناوانەمان هەڵبژاردووە."
به‌ڵام كادیره‌كه‌ى پارتى كه خۆیشی یه‌كێكه له‌وانه‌ى له سكاڵاكاندا ناوى هاتووه، باس له‌وه‌ده‌كات "مەسەلەکان ئەوەندە سیاسین تەنانەت پارێزەرەکانیش پێکەنینیان بە دۆخەکە دێت".
وتیشی: "ئەمە دەستی سیاسییە و بۆ لێدانە لە خودی سه‌رۆك بارزانى، چونکە یەکەم کەس شکات لەو کراوە."
له‌به‌رامبه‌ردا ستێفن ڕه‌دی ده‌كاته‌وه كه كاره‌كه‌یان ده‌ستی سیاسی بێت.
ئه‌و وتى: كاركه‌ى ئێمه سكاڵای مه‌ده‌نییه نه‌ك سیاسی.